Itsasotik sortu ginen, ura hastapenetik bizi hats,
Itsaso deiadarrak larrua onduz gizona handitzen.
Ni ur gazira noa dena hantzi arte, uran ito naitezen
Arrantzale galduen itsas barrutira hitzak isilduz
Bizi ispilua puskatuz, iragan arrastak urratuz.
Hirien azantza hutsek, dauzkate haurren dantzak irentsi
Dena desegin, gutun ta argazki erre, maletak hustu
Isiltasunez jabetu, goiz batez hitz gabe itsasoa hartu
Haurrek jakin dezatela banoala nonbait hau utzirik
Hagunak, korailak, kolorezko malkoak beste beharrik
Behin betiko kaiako zilbor-hesteak moztu, lurra ahanztu
Nortasuna erraustu gabe, eromena aurkitu aitzin.
Egutegiak lau haizetara bidali, ez dezatan noiz den jakin
Larrua larruntx izan dadin atera naiten izaltsutik,
Ta olatuek aska nezatela zauri illunetatik.
Jorratu ditut gezurrezko egia guztiak mila aldiz
Norgehiagoka horretan askotan ni galtzaile izan naiz
Itsas-mareek, ihes eremanen daukate zuen zepoetatik
Uholde batean ontziratua itsas haizeek pusaturik
Ahantzitako mendeetako mariñeleen gisa ausarturik.
Ipar izarra galdu duen gizona naiz itsas horretan.
Itsaso deiadarrak diot gizona handitzen duela
Mugagabetasun horretan ezer gira, aske senti girela
Nahiko litaike ahanzteko, oinarritara joateko
Hiri galduetan haurren irri dantzak berriz entzuteko.
Itsasotik sortu ginen, ura hastapenetik bizi hats
Urperatu haur galdua bizia hasi zen iturrira
Ezkutatu erantzunak jorratu, ur-zorrotik berriz atera
Itsas haizeak goiztiria dakar ta pizkundea sartzen
Itsaso deiadarrak larrua onduz gizona handitzen.