Otsail neguko gau batean
segalari hotza gurutzatu nuen
Hor zegoen neri so,
ni lurrean heriotza
ta biziaren bide erdian
Zenbat denbora egon ginen hor,
bat besteari begira, ez dakit
Zein zegoen hotzena,
asfaltoa
edo segalariaren beso luzatua?
Biziak irabazi omen zuen borroka hura,
ni gizakien artean atxikiz
Baina bizirik gelditu ote naiz,
nere gorputz zauritu hil honekin
Nun ostia ihes egin dute nere zangoek ?
nere lehengo bizitzak ?
Nola erran bizirik naiz!
Egunero zauriek
gau ilun hura nakarte gogora
Egun sentiarekin iduzkia ikusten dut,
euriaren tintak senditzen ditut
Biziaren besoetan nun baita berotzen naiz,
gozatu ere egia erran
Urteak jin, urteak joan,
bere sasoinek berenak ekartzen didate
Otsaila datorrenean aldiz,
mamu guziak esnatzen dira nere baitan
Nere isiltasunean
borroka ezin amaitu bat
daramat urte luze hauetan
Hau bizitu ez duenak ulertu ezin du,
ezin baita hitzekin partekatu
Alde batetik biziaren garrasia,
aitzina joan beharra guzien gainetik
Bestetik galdera hotzak,
zauriaren ostiko fantomatikoen minak
Zertarako balio ote dute,
xutik atxikitzen ez duten zangoek ?
Burumuinak, zainek, odol beltzak,
erraten didate hor daudela
Goizero esnatzean ikusten ditut
hor alferrikan, debaldetan
Jakinez altxatzekotan
burdinezko karro horretan
eseri behar dutala
Alta, lagun, egon hadi lasai
ez duk hor malkorik isurtzeko arrazoinik
Hau nere bizia duk,
ez hirea,
nere borrokaren ondorioa, asumitua
Bidea berriz egitekotan
berdina egingo nikek
dudarik gabe,
Jakizak hilko nauk goiz edo gau batez
jakinez herri honeri eskani zakotena.