Ze eder den bizian aita izaiten
Egunero zuri maitasuna emaiten
Mozkortuz zure haur irriak edaten
Nere besoetan zitutenean babesten
Iragan dira orduak ezin geldi jolasten
Ez ditut beti aurkitu hitzak
Goxatzeko zure haur ametsak
Ez ditut beti ezagutu jestuak
Sendatzeko zure haur zauriak
Alta eskaini dizkuzut bizi urratsak
Gure desberdintasunekin
Gure nigarrekin baita irriekin
Tarteka gure isiltasun hitzekin
Gure bi bihotzek bat egitearekin
Handitu gira bata-bestearen altxorrarekin
Miraila bat bezala didazu bidaltzen
Zure begietan nereak ditut ikusten
Zure zainetan nere odola isurtzen
Zure ametsetan nereak bideratzen
Gure eskuetan maitasuna loratzen
Orain eraiki seme zure bidea
Ideki beldur gabe zure horrialdea
Nere gorputz, bihotza zurean gordea
Gure baitan baita aita seme odol senidea
Zoaz eta ez ahantz gure maitasuna ordea